नवी मुंबई टोलेजंग करण्याचा चंग
10 May, 2009
मुंबई शहरातील शैक्षणिक संस्थांना मिळणारा ५ .३२ एफएसआय नवी मुंब ईतील शैक्षणिक संस्थांना मिळावा, असा शिक्षणसम्राटांचा आग्रह आहे.
मुंबई शहरातील शैक्षणिक संस्थांना मिळणारा ५.३२ एफएसआय (चटई क्षेत्र निर्देशांक) नवी मुंबईतील शैक्षणिक संस्थांना मिळावा, असा शिक्षणसम्राटांचा आग्रह असून स्वत:ची शिक्षणसंस्था असलेले महसूलमंत्री डॉ. पतंगराव कदम यांनीच त्याला हिरवा कंदील दाखवल्याने या हट्टाला भलतेच वजन आले आहे.
राज्य मंत्रिमंडळाच्या बैठकीत १३ मे रोजी हा प्रस्ताव आणला जाणार असल्याची माहिती मिळते. शिक्षणसम्राटांनी नवी मुंबईतील त्यांच्या शिक्षणसंस्था टोलेजंग करण्याचा चंगच बांधला आहे. महसूलमंत्र्यांकडे गुरुवारी यासंदर्भात बैठक झाली. तेथे कमलकिशोर कदम तसेच यासंदर्भात नियुक्त केलेल्या समितीचे सदस्यही उपस्थित होते. त्यात माजी महसूल मंत्री शिवाजीराव पाटील-निलंगेकर, माजी मुख्य सचिव अरुण बोंगीरवार आदींचा समावेश होता. कमलकिशोर कदम यांनी ‘एफएसआय वाढवून मिळालाच पाहिजे’ असा निर्वाणीचा इशारा दिला, असे समजते.
राज्यातील राजकारण्यांनी नवी मुंबईतील सरकारच्या जमिनी नगण्य भावात बळकावून त्यावर शैक्षणिक संस्था उभारल्या आहेत. या नेत्यांनी आपल्या शिक्षण संस्थांचा १५ टक्के भाग अन्य कमर्शिअल वापरासाठी उपयोगात आणण्याची मान्यता घेतली आहे, आता एफएसआय वाढवून घेतल्यानंतर कमर्शिअल वापरासाठी मोठय़ा प्रमाणात जागा उपलब्ध होऊ शकेल.
शैक्षणिक संस्था कमर्शिअल झालेल्याच आहेत, २५ ते ५० लाखांपर्यंत डोनेशन घेण्यापर्यंत मजल गेलेलीच आहे, गरीब विद्यार्थ्यांना शैक्षणिक शुल्कात सवलत दिली जात नाही, शिक्षण शुल्क समितीने ठरवून दिलेले शुल्कासंबंधीचे नियम डावलले जात आहेत. असे असतानाही सरकारवर दबाव वाढवून फायदे घेतले जात आहेत.
मुंबई शहरात सरकारी, निमसरकारी व खासगी शिक्षणसंस्थांना (नोंदणी धर्मादाय आयुक्तांकडे झाली असल्यास) एफएसआय वाढवून देण्यात आला आहे. मुंबई शहरात एकऐवजी ५.३२, तर उपनगरात १.३३ ऐवजी ४ एवढा एफएसआय देण्यात आलेला आहे. नवी मुंबईत एफएसआय वाढ मुंबई शहराप्रमाणेच मिळावी, असा शिक्षणसम्राटांचा हट्ट आहे.
एफएसआयचा फायदा कुणाला?
* पतंगराव कदम : भारती विद्यापीठ (सीबीडी बेलापूर)
* डी. वाय. पाटील : डी. वाय. पाटील वैद्यकीय व इंजिनीअरिंग महाविद्यालय (नेरुळ)
* कमलकिशोर कदम : महात्मा गांधी वैद्यकीय महाविद्यालय व रुग्णालय (कामोठे, सीबीडी व वाशी)
* डॉ. पदमसिंह पाटील : तेरणा वैद्यकीय महाविद्यालय (नेरुळ, कोपरखरणे)
* सतीश चतुर्वेदी : लो. टिळक इंजिनीअरिंग (कोपरखरणे)
* विलासराव देशमुख : सुशीलादेवी शैक्षणिक संस्था (वाशी)
गणेश नाईक, रोहिदास पाटील, जावेद खान, सुनील तटकरे, नामदेव भगत, मंदा म्हात्रे यांच्याही शिक्षणसंस्था.
0 comments:
Post a Comment